Вӑрмар районӗнчи Шӑхаль ялӗнче пысӑк ҫӑлкуҫ патне илсе каякан ҫӗнӗ кӗпер тунӑ. Кун пирки Шӑхаль ял тӑрӑхӗн пресс-служби пӗлтерет.
Шарпаш ҫырми урлӑ хывнӑ кӗпере тимӗртен тунӑ, унӑн хакӗ 299 990,40 тенке кайса ларнӑ. Ҫав хушӑрах ӑна тума пуҫаруллӑ бюджет программипе усӑ курнӑ — ял ҫыннисем кӗпер хакӗн 20 процентне тӳленӗ.
Аса илтеретпӗр, унччен эпир Пӑрачкавра йывӑҫ кӗпер туни ҫинчен пӗлтернӗччӗ. Унӑн хакӗ ҫур миллиона яхӑн тенке ларнӑччӗ. Паллах, Пӑрачкаври кӗпер Шӑхальтинчен вӑрӑмрах пулса тухнӑ-ха ӗнтӗ.
Ҫавах та Шӑхальти кӗпер йӳнӗрех пулнине, ҫирӗп тунӑран ялти халӑха чылайрах вӑхӑт хушши усӑ кӳме пултарнине палӑртмаллах.
Вӑрмар районӗнчи Ҫиҫтӗпе ялӗ ҫывӑхӗнче ял хуҫалӑх пӗлтерӗшлӗ ҫӗр ҫинче типӗ курӑк тата тӗмсем ҫуннӑ. Кун пирки пушарнӑйсене ҫурла уйӑхӗн 21-мӗшӗнче 13 сехет те 45 минутра пӗлтернӗ.
Ҫулӑм 70 гектар ҫӗр ҫинче алхаснӑ. Ӑна сӳнтерме Сӗнтӗрвӑрри тата Канаш районӗсенчи вӑрман хуҫалӑхӗнчи ӗҫченсем ҫитнӗ. Пушара 5 техника сӳнтернӗ.
Ҫулӑмпа кӗрешме Вӑрмар районӗнчи 20 ҫын ҫитнӗ. Район администрацийӗн пуҫлӑхӗ Дмитрий Иванов тата Кавал ял тӑрӑхӗн ертӳҫи Алексей Николаев та вырӑнта пулнӑ.
Паян, ҫурла уйӑхӗн 19-мӗшӗнче, 11 сехетре Вӑрмар районӗнче тин пиҫсе тухнӑ ҫӑкӑр турттаракан машина аварие ҫакланнӑ. Кун пирки «Про Город» хаҫата халӑх корреспонденчӗ пӗлтернӗ.
Водитель Кавал ялне кӗнӗ ҫӗрте руле итлеттереймесӗр ҫул ҫинчен тухса кайнӑ. Машина ҫаврӑнса ӳкнӗ. Юрать-ха, водитель аманман, хӑйне чиперех туять.
Паян тепӗр авари Етӗрне районӗнче пулнӑ. Кӑнтӑрла иртсен, 13 сехет тӗлне, ҫӑмӑл машина Етӗрне хулинчен тухсанах ҫаврӑнса ӳкнӗ.
Ҫурла уйӑхӗн 9-15-мӗшӗсенче Чӑваш Енре 4150 ҫынна ОРВИ диагноз лартнӑ. Иртнӗ эрнерипе танлаштарсан, кӑтарту 7 процент чакнӑ. Ҫапах чирлесси пысӑк шайра-ха.
Чирленисенчен 2745-шӗ пульницӑна кайса пулӑшу ыйтнӑ. Иртнӗ эрнере ытларах Ҫӗнӗ Шупашкарта /247 ҫын/ тата Канаш хулинче /196 ҫын/ чирленӗ. Ҫӗмӗрлере 137 ҫын чирленӗ. Иртнӗ эрнерипе танлаштарсан, унта ку кӑтарту виҫӗ хутчен ӳснӗ.
Йӗпреҫ, Красноармейски, Вӑрмар районӗсенче ҫынсем сахалрах чирленине палӑртнӑ. Сӑмах май, виҫҫӗмӗш кун ӗнтӗ республикӑра пӗр талӑкра 10 ҫын кӑшӑлвируспа чирлет. Ку таранччен вируса пула 1871 ҫыннӑн пурнӑҫӗ татӑлнӑ. Ҫурла уйӑхӗнче 151 ҫын кӑшӑлвируса пула вилнӗ.
Республикӑри хӑш-пӗр муниципалитетра чару мерисене ҫирӗплетме пултарассине Чӑваш халӑх сайчӗ ӗнер пӗлтернӗччӗ. Паян ҫавӑн пек мерӑна йышӑннӑ та.
Кӑшӑлвируспа ҫыхӑннӑ ҫирӗп йӗрке Улатӑр хулинче, Улатӑр районӗнче тата Пӑрачкав районӗнче эрнене тӑсӑлӗ. Лару-тӑру лайӑхланмасан чару вӑхӑтне тата тӑсӗҫ.
Ҫурла уйӑхӗн 12-мӗшӗ тӗлне ҫынсен вилеслӗх кӑтартӑвӗ Чӑваш Енре 100 пин ҫын пуҫне 138,5-пе танлашнӑ, Улатӑрта ҫав кӑтарту — 297,1, Улатӑр районӗнче – 293,2, Пӑрачкав районӗнче – 195,8. Вӑрмар районӗ те хӑрушлӑх зонинче, анчах унта хальлӗхе чару мерисене ҫирӗплетмен.
Маларах асӑннӑ виҫӗ муниципалитетра массӑллӑ мероприятисем (ҫав шутра суйлав умӗнхи агитаци те) ирттермӗҫ. Обществӑлла апатлану предприятийӗсем каҫхи 9 сехетчен ҫеҫ ӗҫлӗҫ, зал 50 процентран ытла тулли пулмалла мар.
Вӑрмар районӗнчи Энӗшпуҫ станцийӗ патӗнчи чукун ҫула вӑхӑтлӑха хупса хурӗҫ.
«Раҫҫейӗн чукун ҫулӗсем» акционерсен обществ пӗлтернӗ тӑрах, «Энӗшпуҫ станцийӗ – Вӑрмар» ҫулӑн участокӗнчи рельссене ылмаштарма палӑртнӑ. Чукун ҫула ҫурла уйӑхӗн 8-9-мӗшӗсенче юсӗҫ. Ҫавна май ӗҫе ҫурла уйӑхӗн 8-мӗшӗнчи 12 сехетрен пуҫласа ҫурла уйӑхӗн 9-мӗшӗнчи 12 сехетчен пурнӑҫлӗҫ.
Юсав вӑхӑтӗнче чукун ҫул урлӑ транспорт та каҫса ҫӳреймӗ.
Утӑ уйӑхӗн 27-мӗшӗнче Вӑрмар районӗнче хуҫасӑр арман ҫуннӑ. Кун пирки Инкеклӗ лару-тӑру министерстви пӗлтерет.
Арман Хуруй ялӗ хӗрринче ларать. Вӑл ҫунма тытӑнсан пушарнӑсем часах ҫитнӗ. Юрать-ха, арман ҫунса кӗлленмен, ӑна упраса хӑварма май килнӗ. Малтанлӑха палӑртнӑ тӑрӑх, арманти пушар ҫулӑмпа асӑрханмасӑр усӑ курнӑран тухнӑ.
Палӑртмалла: ҫулталӑк пуҫланнӑранпа республикӑра 976 пушар тухнӑ, вӗсенче 59 ҫын вилнӗ, 49 ҫын суранланнӑ.
Чӑваш Ен Элтеперӗ Олег Николаев шӑматкун Ҫӗмӗрлери территорисем хушшинчи медицина центрӗнче пулнӑ. Республикӑн влаҫ органӗсен официаллӑ порталӗнче пӗлтернӗ тӑрӑх, Ҫӗмӗрле ертӳҫисене халӑха кӑшӑлвирусран прививка тӑвас ӗҫе начар йӗркеленӗшӗн сӑмах лекнӗ.
Юлашки кунсенче пирӗн республикӑра талӑксерен 8 пин ҫын прививка тутарасшӑн иккен. Унччен ҫак цифра 4 пинпе танлашнӑ. Ҫавна май медицина учрежденийӗсенче черет вӑрӑмланнӑ. Апла пулсан ӗҫе ҫӗнӗ лару-тӑрӑва кура йӗркелеме тивет.
Паянхи куна илсен Ҫӗмӗрлере кунсерен 350 ытла ҫынна вакцинацилеме пулать, анчах чи хӗрӳ вӑхӑтра та кунсерен 160 ҫын ҫеҫ прививка тутарнӑ.
Элтепер шухӑшланӑ тӑрӑх, халӑхпа ытларах ӗҫлемелле, кӑшӑлвирусран епле хӳтӗленмелли ҫинчен ытларах каласа кӑтартмалла. Ҫӗмӗрлере е ытти муниципалитетра вакцинаци валли хушма бригада кирлӗ пулсан унта ытти ҫӗртисене яма пулать тесе палӑртса хӑварнӑ Олег Николаев.
Канаш хулинче, Красноармейски тата Хӗрлӗ Чутай районӗсенче вакцинаци витӗр халӑхӑн 40 ытла проценчӗ тухнӑ. Ҫӗнӗ Шупашкарпа Улатӑр хулисенче, Вӑрмар, Тӑвай, Элӗк тата Улатӑр районӗсенче прививка тутарнисен хисепӗ 30 процентран сахалрах.
Вӑрмар районӗнчи Аслӑ Пинер ялӗнче пурӑнакан 34 ҫулти арҫын тӗлӗшпе Следстви комитечӗ пуҫиле ӗҫ пуҫарнӑ. Вӑл ҫынна асӑрханмасӑр вӗлернӗ тесе шухӑшлаҫҫӗ.
Следстви пӗлтернӗ тӑрӑх, ҫӗртме уйӑхӗн 28-мӗшӗнче 23 сехетре вӑл пӗрле пурӑнакан хӗрарӑма вӗлернӗ. Хайхискер ӑна ҫӗҫӗпе тапӑннӑ. Арҫын пиччӗшӗпе тата ҫак хӗрарӑмпа пурӑннӑ. Савнине пиччӗшӗ ҫумне кӗвӗҫнипе вӑл ҫӗҫӗ ярса тытнӑ.
Арҫынна тытса чарнӑ.
Вӑрмар районӗнчи Кӗтеснер ялӗнче ҫӗртмен 16-мӗшӗнче Ленин урамӗнчи ҫуртӑн тӑрри ҫунма пуҫланӑ. 22 сехет ҫурӑра пушар тухнине Владимир Димитриев полицейски асӑрханӑ. Вӑл ун чухне кӳршӗ ялтан таврӑннӑ.
Пушар пирки тӳрех ҫӑлавҫӑсене пӗлтернӗ. Пӗр тӑхтамасӑр вӑл алӑкран шаккама тытӑннӑ. Пӳртре отпуска килнӗ мӑшӑр, вӗсен 4-ри хӗрӗ тата 9 ҫулти тӑванӗ ҫывӑрнӑ. Шакканине илтсе вӗсем вӑраннӑ, урама тухса ӗлкӗрнӗ. Полицейски ирчченех унта пулнӑ, пушара сӳнтерме пулӑшнӑ. Кайран вӑл ӗҫе кайнӑ.
+23.3 °C